ஆர்ப்பாட்ட இடத்திற்கு சென்ற அமைச்சருக்கு போத்தலடி !
25 July, 2013 by admin
ஆர்பாட்டம் நடைபெறும் இடத்திற்கு அமைச்சர் சென்றால், அவர்கள் ஆர்பாட்டத்தைக் கைவிடுவார்கள் என்று யார் சொன்னது ? இலங்கையில் அமைச்சர் ஒருவர் ஆர்பாட்டக்காரர்களிடம் போத்தலால் அடிவாங்கியுள்ளார். நேற்றைய தினம்(24) காலி வீதியின் மொரட்டுவ - ராவத்தாவத்த பகுதியில் மரவேலை செய்வோர் ஆர்ப்பாட்டத்தில் ஈடுபட்டனர். இதனால் போக்குவரத்து நெரிசல் ஏற்பட்டது. இவர்கள் காலு-கட்டுபெத்த பகுதியில் காலி வீதியை மறித்து ஆர்ப்பாட்டத்தில் ஈடுபட்டனர். தமது உற்பத்தி பொருட்களுக்கு நியாயமான விலை தருமாறு கோரியே இவர்கள் ஆர்ப்பாட்டம் மேற்கொண்டனர் என அறியப்படுகிறது.இதனையடுத்து நிலைமையைக் கட்டுப்பாட்டிற்குள் கொண்டுவர அமைச்சர் ஜீவன் குமாரதுங்க சம்பவ இடத்துக்கு விரைந்துள்ளார். அவர் அங்கே சென்று காரில் இருந்து இறங்கிய மறுகணமே அவர் மீது போத்தல் தாக்குதல் நடத்தப்பட்டுள்ளது. உடனே அவர் மீண்டும் காருக்குள் ஏற்றப்பட்டார். அவரைப் பொலிசார் பாதுகாப்பாக அவ்விடத்தில் இருந்து அழைத்துச் சென்றுவிட்டார்கள். ஆக மொத்தத்தில் அமைச்சர் எஸ்கேப் அவ்வளவுதான் !
சிங்களவர்களிடமும் நரிப் புத்தியைக் காட்டும் மகிந்தர் !
25 July, 2013 by admin
தமிழர்களைப் பிரித்து , ஒரு பிரிவினரை தன்வசப்படுத்தி வைத்திருக்கும் மகிந்தர் புலம்பெயர் நாடுகளிலும் இதே சேட்டையை தான் அரங்கேற்றினார். புலனாய்வுப் பிரிவினரைப் பாவித்து அவர் ஏவிய பலர் வெளிநாடுகளுக்கு வந்து தாமே புலிகள் என்றும், இனி தாமே எல்லாவற்றையும் செய்வோம் என்று சொல்லி பல புலம்பெயர் நாடுகளில் குழப்பங்களை ஆரம்பித்தார்கள். போதாக்குறைக்கு இவர்கள் சண்டைபோட ஜாதிக் கலவர மைதானம் அமைத்தது போல சில தொலைக்காட்சிகளும் அவர்களை அழைத்து பேட்டி எடுத்து பிரச்சனைகளை பூதாகரமாக்கியது. இறுதியில் புதிதாக முளைத்தவர்கள் அனைவரும் தற்போது எங்கே போனார்கள் என்று தெரியவில்லை. ஆனால் தற்போது புலம்பெயர் தமிழர்கள் மத்தியில் பிளவு மட்டுமே மிஞ்சியுள்ளது. இதுபோல பிரித்து ஆளும் பிரித்தானியர்களின் தந்திரத்தை கரைத்துக் குடித்துள்ள மகிந்தர், தமிழர்களிடம் காட்டிய அதே தந்திரத்தை சிங்களவர்களிடமும் காட்ட தயங்கவில்லை. இலங்கையில் உள்ள எதிர்கட்சியானா ஐக்கிய தேசிய கட்சியின் பல பிரமுகர்களை தன்வசம் கவர்ந்த மகிந்தர் அக் கட்சியை செல்லாக் காசு ஆக்கிவிட்டார். இன்றைய நிலையில் இலங்கையில் ஒரு பலமான எதிர்கட்சியே இல்லை என்று சொல்லும் அளவுக்கு நிலைமை படுமோசமாக இருக்கிறது. இன் நிலையில் ஐக்கிய தேசிய கட்சியில் இருந்து மற்றுமொரு பெரிய பிரபலம் மகிந்தர் பக்கம் தாவியுள்ளார். அவர் வேறு யாரும் அல்ல, தயஸ்ரீ ஜயசேகர தான். ஐக்கிய தேசிய கட்சியின் ஒரு முதுகெலும்பாக இருந்த தயஸ்ரீ , தற்போது மகிந்தர் போடும் எலும்புத்துண்டுக்கு வாலாட்டிக்கொண்டு கட்சி விட்டு கட்சி தாவியுள்ளார். இச் செய்தியானது ரணில் விக்கிரமசிங்கவின் வயிற்றில் புளியைக் கரைக்கும் செய்தியாக உள்ளது.
பலத்தை இழந்து பெயரையும் புகழையும் இழந்து நிற்கும் ரணில் விக்கிரமசிங்க, ஐக்கிய தேசிய கட்சியை இனி தூக்கி நிறுத்த முடியாத முடவன் ஆனார் என்பது பலருக்கும் தெரியும். ஆனால் தலைமைப் பதவியை விட்டுக்கொடுக்காமல் அவர் தொடர்ந்து இருந்துவருகிறார். ஐக்கிய தேசிய கட்சியில் பல இளையவர்கள், மற்றும் அக் கட்சியை செவ்வனவே நடத்தக் கூடியவர்கள் இருக்கிறார்கள். ஆனால் அவர்களுக்கும் இவர் இடம் கொடுப்பதாகத் தெரியவில்லை. ஆக மொத்தத்தில் கட்சி பாதாளத்தில் விழுந்தாலும் பரவாயில்லை, நான் தலைவராக இருக்கவேண்டும் என்ற பேராசையால், இலங்கையில் உள்ள எதிர்கட்சியை ஒரு செல்லாக் காசாக மாற்றியுள்ளா ரணில். மகிந்தரின் கரங்கள் முன்னெப்பொழுதும் இல்லாதவாறு பலமடைந்து வருகின்றது என்பதே உண்மை நிலையாகும்.
Geen opmerkingen:
Een reactie posten